Ishonch telefoni (+998 71) 237-99-98Dush. – Jum. 9-00 dan 18-00 gacha

Vokzal ma’lumotxonasi 1005Kecha-kunduz

21:27:45 (GMT +5), dushanba, 24 sentabr 2018

Chuqursoy stantsiyasi nufuzi ortmoqda

O'zbekiston Respublikasi Prezidenti Shavkat Mirziyoev 2018 yil 29 iyun kuni Olmazor tumaniga amalga oshirgan tashrifi davomida Chuqursoy stantsiyasida bo'lib, bu yerda amalga oshirilishi lozim bo'lgan muhim vazifa, taklif va topshiriqlarni belgilab bergan edi. Qisqa fursatda poytaxtimizdagi yirik stantsiyada bir qancha ishlar amalga oshirildi. Xususan, bu yerda obodonlashtirish ishlari jadal suratlarda yakuniga yetkazildi. Shuningdek, bugungi kunda dolzarb mavzuga aylangan zamonaviy va qulay transport tashuvlari vositasi hisoblangan konteynerlar ishtirokida halqaro logistika markazlarini barpo etish bo'yicha Chuqursoy yuk saroyi o'rnida zamonaviy texnologiyalar asosida faoliyat ko'rsatuvchi logistika markazini tashkil qilish bo'yicha taklif ishlab chiqildi.


Ushbu loyiha yuzasidan “O'zbekiston temir yo'llari” aksiyadorlik jamiyatida yig'ilish bo'lib o'tdi. Unda mutasaddi tashkilot rahbarlari, mutaxassislar, loyiha institutlari muxandislari ishtirok etishdi. Yig'ilishda amalga oshirilishi ko'zda tutilayotgan bunyodkorlik ishlarining ahamiyati, yangi taklifning texnik va texnologik jihatlari xususida fikr yuritildi. Ta'kidlanganidek, mavjud yuk saroyi o'rnida zamonaviy logistika markazi barpo etiladi va yon atrofda yangi infratuzilmalar tashkil etiladi. E'tiborlisi mazkur loyiha amalga oshirilgandan so'ng 200 dan ziyod qo'shimcha ish o'rinlari yaratiladi. Zamonaviy va innovatsion texnologiyalarni qo'llash, mijozlarga “Yagona darcha” tizimida xizmat ko'rsatish natijasida konteyner va yuklarni qayta ishlash, ortish va tushirish salohiyati sutkasiga ikki barobarga ko'tariladi. Ya'ni bugungi kunda konteynerlar qabul qilish va saqlash hajmi 10000 konteynerni tashkil qiladi, yuk ortish va tushirish hajmi 240 konteynerni tashkil qiladi.


Ma'lumki, Chuqursoy saralash stantsiyasi “O'zbekiston temir yo'llari” aksidorlik jamiyatining eng yirik stantsiyalaridan biridir. Ushbu maskan MDH temir yo'l stantsiyalari orasida eng yirik stantsiyalar safidan o'rin olib, sinflanishi bo'yicha nosinfiy (vneklassniy) stantsiyalar qatoriga kiradi. Bu yerning umumiy uzunligi 6 kilometrni tashkil etib, unda 3 ta park, 50 dan ziyod qabul qilish, jo'natish va saralash yo'llari hamda 2 ta saralash tepaligi mavjud.

Chuqursoy stantsiyasining nosinfiy yirik stantsiya sinfiga kirishiga asosiy sabab, mazkur maskan boshqa yuk stantsiyalaridan farqli o'laroq, nafaqat yuk ortish va tushirish operatsiyalari balki, Toshkent, Andijon, Namangan, Farg'ona viloyatlari va Toshkent shahriga MDHdan kirib keladigan yuk vagonlarini saralash ishlari bilan shug'ullanadi.


Hozirda bu yerda 400 dan ziyod ishchi va xizmatchillar mehnat qiladi. Ushbu stantsiya O'zbekiston Respublikasi iqtisodiyotida katta o'rin tutadi. Turli xildagi halq xo'jaligi extiyoji mollarini belgilangan manzillariga yetkazib berishda muhim ahamiyat kasb etadi. Stantsiyada sutkasiga 2300 dan ziyod yuk vagonlari qabul qilinib, belgilangan manziliga yetkaziladi va 2100 dan ziyod yuk vagonlari belgilangan manzillari bo'yicha saralanadi. Stantsiyada sutkasiga 200 dan ziyod vagonda mahaliy yo'nalishlardagi yuklar ortiladi va tushiriladi. Bu jarayon stantsiyaga ulangan 45 shaxobcha yo'llarida amalga oshiriladi.

Axborot xizmati

“O‘zbekiston temir yo‘llari” AJ rasmiy saytining materiallaridan foydalanish, shu jumladan republikasiya qilish, faqat belgilangan shartlarni bajargan holatdagina foydalanish mumkin.

BELGILANGAN SHARTLARNI BAJARILMASLIK O‘ZBEKISTON RESPUBLIKASI QONUNCHILIGINING BUZILISHI HISOBLANADI

  • nashr uchun ko’rinish