ЙЎЛ БОЛАЛАР КАСАЛХОНАСИ ЯНА БИТТА ЗАМОНАВИЙ ТИББИЙ ЖИҲОЗГА КЎПАЙДИ
“Темир йўл ижтимоий хизматлар” масъулияти чекланган жамияти Йўл болалар касалхонасининг қулоқ, томоқ, бурун (ЛОР) бўлими хориждан келтирилган замонавий, сўнгги русумдаги тиббий жиҳоз билан таъминланди.
Тажрибали шифокор, 29 йилдан буён ушбу касалхонанинг Лор бўлимида фаолият кўрсатиб, ўтган вақт давомида жуда кўп бўлажак темирйўлчилар ва айни вақтда уларнинг фарзандларига ҳам хизмат кўрсатиб келаётган олий тоифали отоларинголог шифокори Алишер Равшанов билан мазмунли суҳбатимиз бўлимга ўрнатилган замонавий тиббий жиҳознинг афзалликлари ҳамда беморларда кўп учраб тураётган айрим касалликлар сабаблари ҳақида бўлди.
– Алишер ака, касалхонада сўнгги йилларда беморлар учун яратилаётган шароитлар ҳақида гапириб берсангиз?
– Мен ушбу касалхонада 1998 йилдан бери фаолият олиб бораётган бўлсам, ҳозирги ҳолат ва шароит билан у даврдаги ҳолатни ер билан осмонча фарқи бор, десам муболаға бўлмайди. Хусусан, айни вақтда биноларнинг ташқи ва ички қисмларини таъмирлаш бўйича жуда катта ишлар олиб бориляпти. Шулар қаторида биринчилардан бўлиб раҳбарият томонидан менинг жажжи беморларимга қулайлик яратиш мақсадида кириш қисмига яқинроқ бўлган бинони таъмирлаб беришди. Чунки ўзингизга маълумки, болажонларнинг аксарият касалликлари қулоқ, бурун, томоқ билан боғлиқ. Шунингдек, бўлимга янги ўрнатилган замонавий тиббий жиҳоз ҳақида ҳам алоҳида тўхталиб ўтиш лозим. Мазкур тиббий ускунани узоқ йил кутган эдик. Чунки 2004 йили айнан шу эндоскоп билан ишлаш бўйича Олмаота шаҳрида ўқиб, сертификат олганман. Шундан кейин бир неча маротаба касалхона учун сотиб олиш зарурлигини айтган эдим. Аммо бу таклифимнинг қаноатлантирилиши бугунги кунга тўғри келди. Касалхонамизда биз ва беморлар учун яратиб берилаётган бу каби шароитлар учун “Ўзбекистон темир йўллари” акциядорлик жамияти бошқаруви раиси З.Нарзуллаев ҳамда “Темир йўл ижтимоий хизматлар” масъулияти чекланган жамияти раҳбариятига катта миннатдорчилик билдирамиз. Янги таъмирланган ва замонавий жиҳозлар билан тўлдирилган бўлимда нафақат болажонларга, балки катталарга ҳам, хусусан, шу атрофдаги аҳолига, халққа 24 соат хизмат кўрсатмоқдамиз.
– Ушбу ускунанинг афзалликлари нималардан иборат?
– Аввало, у ҳозирги кундаги энг замонавий лор касалликларини аниқлаш ва даволаш ускунасидир. У бир вақтнинг ўзида аниқ ташхис қўйиш ва муолажалар қилишда жуда қулай, осон ва енгил. Айниқса, бемор кўрик давомида экран орқали лор органларидаги ҳолатни ўз кўзи билан кўриб туради. Қулоқ, томоқ, бурун ювишда ускунанинг ўзи керакли дориларни қиздириб беради ва унинг бир қисми бўлган бемор ўтирадиган курси ҳам тугмачалар ёрдамида керак бўлган ҳар хил ҳолатга келтирилади.
– Алишер ака, кимдир сурункали тонзиллитда бодомсимон безларни олдирган маъқул, бошқа биров эса бу безга умуман тегиш мумкин эмас, дейди. Мутахассис сифатида бунга сизнинг фикрингиз қандай?
– Олдинлари кимда сурункали тонзиллит ташхиси қўйилса, бодомсимон безлар олиб ташланган. Бироқ ҳозирги тиббиёт бўйича бодомсимон безларни имкон қадар сақлаб қолиш керак, чунки уни ўзига яраша яхши томонлари жуда кўп. Биринчидан, фильтр вазифасини бажаради, микробларни ушлаб қолади, ҳавони иситиб, намлаб беради, иммунитетни ҳам сақлаб туришда роль ўйнайди. Шунинг учун ҳозирги кунда бутун дунё тажрибаси бўйича мазкур безни бирданига олиб ташлаш керак, деган нарса йўқ. Ангинани олдини олиб, вақтида даволаб, физиотерапия муолажаларини қилиб, муздек егуликлар, совуқ ҳаводан эҳтиёт қилиб юрилса, 70 фоизга яхши бўлиб кетади. Бўлмаса, асорати бошқа органларга бера бошлайди. Яъни буйракда, юракда ўзгариш бўлади, оёқда шишлар, оғриқлар кузатилади. Шундай ҳолатларда таҳлиллар олиниб, биринчи муолажалар қилиб кўрилади. Агар шундан сўнг ҳам яхши натижаларга эришилмаса, асоратлар берса охирги чора – тонзиллэктомиядир. Бугунги кунда иложи борича тузатишга ҳаракат қилинади, бактериологик суртмалар олиниб, санация қилинади, бурундаги аденоидлар текширилади, томоқ ювдирилади, инъекция, лазер, физиотерапиялар қилиниб, иммунитет кўтарилади. Шунда беморларнинг 70-80 фоизи яхши бўлиб кетади.
– Сўнгги йилларда беморларда бурунни ювдириш ҳолатлари ҳам кўпайиб бормоқда. Аслида бурун қайси ҳолатларда ювилиши керак?
– Бу муҳокамали савол. Бурун оқишида оддий тумов, грипп, ринит ринофарингитда бурун ҳеч қачон ювилмайди. Бурун чиғаноқлари ва ўрта бурун йўли ҳамда гоймар пешона бўшлиғида каналлар келади, уларни эндоскопда кўрганда каналдан йиринг чиқиб туради, шундан сўнг рентген қилингач, ювиш керак бўлади.
Ушбу суҳбатимиз жараёнида Алишер ака қабулига 2 нафар жажжигина опа-сингил беморлар ташриф буюрди. Кейин билсам, уларни олиб келган отаси темирйўлчи бўлиб, болалик пайтлариданоқ Алишер акага даво истаб тез-тез келиб турган экан. Болажонлар ҳам ўз уйидек кириб келишар экан. Алишер ака уларни набираларидек – бола тили билан кутиб олди. Энг қизиғи, болажонлар ўз хоҳиши билан бемор курсисига ўтириб, ҳаттоки экрандаги бурун ва томоқдаги ўзгаришларни қизиқиш билан кузатишди. Билишимча, бу ускунадан улар иккинчи маротаба фойдаланаётганлари учун ўзларини эркин тутишган экан.
Шундай қилиб, суҳбат давомида айтилган гапларга амалда ҳам гувоҳ бўлдим.
Назокат НУРМАТОВА
суҳбатлашди
