Prezidentimiz yer usti metropolitenining halqa liniyasining II bosqichi qurilishi yakunlangani bilan tanishdi
O‘zbekiston Respublikasi Mustaqilligining 32 yilligini temiryo‘lchilar katta bunyodkorlik ishlari yakuni bilan kutib olishmoqda. Mamlakatimizning eng muhim bayramlaridan biri bo‘lgan ushbu sana munosabati bilan “O‘zbekiston temir yo‘llari” aksiyadorlik jamiyati jamoasi yirik loyiha asosida bunyod etilayotgan tarixiy qurilishni muvaffaqiyatli yakunladi.
O‘zbekiston Respublikasi Prezidentining 2017 yil 19 maydagi “Toshkent shahrida yer usti metro liniyalarining qurilishi” loyihasini amalga oshirish chora-tadbirlari to‘g‘risida”gi qaroriga asosan “Qo‘yliq – Quruvchilar” uchastkasining 2-bosqichi bo‘lgan 12-bekatdan so‘ng 13- hamda 14-bekatlarda qurilish ishlari yakuniga yetkazildi.
Taʼkidlash lozimki, “O‘zbekiston temir yo‘llari” aksiyadorlik jamiyati mutaxassislari tomonidan 2020 yilning avgust oyida poytaxtimizda bunyod etilgan yer usti halqa metro yo‘nalishining 1-bosqichi bo‘lgan “Do‘stlik – Qo‘yliq” uchastkasida 7 Ta bekat qurilib, foydalanishga topshirilgan bo‘lsa, 2023 yil aprel oyida ushbu loyihaning davomi bo‘lgan 2-bosqichida 7,74 kilometrlik “Qo‘yliq – Quruvchilar” uchastkasida yana 5 Ta yangi bekat ochilgan edi.
O‘tgan vaqt davomida mazkur loyihaning 2-bosqich qismidagi 12-bekatdan so‘ng 3,64 kilometrlik “Quruvchilar – Qipchoq” uchastkasida ham bunyodkorlik ishlari jadallik bilan amalga oshirildi. 13-bekat 2 qavatdan iborat bo‘lib, 1-qavatda xizmat ko‘rsatish xonalari va chiptaxonalar joylashgan bo‘lsa, perron 2-qavatda qurilgan. 14-bekat esa 1 qavatdan iborat bo‘lib, ushbu bekat Sergeli yer usti yo‘nalishining 5-bekatiga yo‘lovchilar yo‘lagi orqali ulandi. Shuning uchun 14-bekatdan Sergeli yer usti yo‘nalishining 5-bekatiga o‘tish uchun mustahkam yo‘lovchilar yo‘lagi qurildi.
29 avgust kuni Prezidentimiz Shavkat Mirziyoyev va hukumat rahbarlari ushbu transport inshootini borib ko‘rishdi, jamoatchilik vakillari bilan birga metroda yurishdi.
– 2017 yilda bu loyihani boshlaganimizda ishonmaganlar ham bo‘lgan edi, – dedi davlatimiz rahbari. – Mana, Xudoga shukur, yero osti va yer usti metro yo‘llari bog‘lanib, halqaga aylandi. To‘g‘ri, og‘ir bo‘ldi. Lekin xalqimizga xizmat qiladigan, tarixda qoladigan yo‘l bu. Odamlarimiz, farzandlarimiz bunda yurib, davlatdan rozi bo‘lsa, niyatimizga yetgan bo‘lamiz.
Mazkur ikkinchi bosqich doirasida 12 kilometr estakada yo‘l va 7 ta bekat barpo etilgan. Bu oraliqdagi qatnov vaqti 15 daqiqani tashkil etadi. Bir kunda 40 mingdan ortiq yo‘lovchiga xizmat ko‘rsatiladi. Umuman, bugun Toshkent metropolitenining jami uzunligi 70 kilometrdan oshdi. Shundan 38 kilometri 1977 yildan keyin bunyod etilgan bo‘lsa, oxirgi 7 yilda 32 kilometr metro yo‘li qurildi. Bekatlar soni 50 taga yetdi. Metroda yuruvchi kunlik yo‘lovchilar soni 750 mingga yetishi kutilmoqda.
“O‘zbekiston temir yo‘llari” AJ
Axborot-tahliliy media markazi
“O‘zbekiston temir yo‘llari” AJ rasmiy saytining materiallaridan foydalanish, shu jumladan republikasiya qilish, faqat belgilangan shartlarni bajargan holatdagina foydalanish mumkin.
BELGILANGAN SHARTLARNI BAJARILMASLIK O‘ZBEKISTON RESPUBLIKASI QONUNCHILIGINING BUZILISHI HISOBLANADI
