O‘zbekiston
temir yo‘llari

Aksiyadorlik jamiyati

Temiryo‘lchilar o‘rtasida “Zakovat” intellektual o‘yini bo‘lib o‘tdi

Joriy yilning 1 noyabr kuni Zakovat arenasida temiryo‘lchilar o‘rtasida “Zakovat” intellektual o‘yining yakuniy Respublika bosqichi o‘tkazildi.

Unda “O‘zbekiston temir yo‘llari” AJ tasarrufidagi boshqarma, departament, markaz, korxona, tashkilot va muassasalarda faoliyat yuritayotgan temiryo‘lchilar hamda OAV vakillari ishtirok etishdi. 

“Zakovat” intellektual o‘yining yakuniy Respublika bosqichida har bir jamoada 6 nafardan ishtirokchi jami 45 ta jamoa g‘oliblik uchun bellashadi.

11 noyabr — Kasaba uyushmalari kuni bayramiga bag‘ishlab O‘zbekiston temiryo‘lchilar va transport quruvchilari kasaba uyushma Markaziy Kengashi bilan hamkorlikda “O‘zbekiston temir yo‘llari” aksiyadorlik jamiyati tasarrufidagi boshqarma, departament, markaz, korxona, tashkilot va muassasalarida ishchi-xodimlar o‘rtasida  “Zakovat” intellektual o‘yining saralash bosqichlari  o‘tkazildi. Temiryo‘lchi ishchi-xodimlarning intellektual salohiyatini hamda ularning mustaqil fikrlash qobiliyatlarini yanada oshirish, hozirgi shiddat bilan taraqqiy etayotgan zamonda nafaqat tarixiy, balki dunyoviy, falsafiy va zamonaviy bilimlarni puxta egallash, doimo o‘qish va izlanish, intellektual salohiyatli, dunyoqarashi keng yoshlarni shakllantirish maqsadida tashkil etilgan saralash bosqichlarida 1000 nafarga yaqin temiryo‘lchilarning ishtiroki ta’minlandi.

— O‘zbekiston Respublikasi Prezidentining 2022 yil 20 yanvardagi PQ-96-sonli “Zakovat” intellektual o‘yini aholi o‘rtasida ommaviy ma’rifiy harakatga aylantirish va boshqa intellektual o‘yinlarni rivojlantirishga oid chora-tadbirlar to‘g‘risida”gi qarori hamda “O‘zbekiston temir yo‘llari” aksiyadorlik jamiyati tizimida 2024 yil yoshlarga oid davlat siyosatini amalga oshirish yuzasidan chora-tadbirlar dasturining 24-bandi ijrosini ta’minlash maqsadida bu turnir 2 bosqichda tashkil etildi, — dedi tanlov tashkilotchisi “O‘zbekiston temir yo‘llari” AJ yetakchilar Kengashi raisi Rasuljon Eshanqulov. — Dastlab, temiryo‘lchi yoshlar o‘rtasida o‘tkazish rejalashtirilgan “Zakovat” intellektual o‘yini O‘zbekiston temiryo‘lchilar va transport quruvchilari kasaba uyushma Markaziy Kengashi tashabbusi bilan temiryo‘lchilar o‘rtasida haqiqiy ommaviy musobaqaga aylanib ketdi, desam mubolag‘a bo‘lmaydi. Temiryo‘lchilarning mantiqiy bilimlarini oshirish, ularni saralash va intellektual o‘yinlarga keng jalb qilish, ushbu o‘yinlar tashkil qilinishini qo‘llab-quvvatlash va zarur shart-sharoitlar yaratish, shuningdek, temiryo‘lchilarning intellektual salohiyatini yuksaltirish maqsadida tashkil etilgan tanlovning barcha hududlarda o‘tgan saralash bosqichi g‘oliblari kasaba uyushmalari bilan hamkorlikda o‘tkazilib, rag‘batlantrib borildi.

Turnir yakuniy bosqichining 1-o‘rin g‘oliblari qimmatbaho esdalik sovg‘alari hamda faxriy yorliq va  Zakovat turnirining ko‘chma kubogini qo‘lga kiritdi.

2-3-o‘rinni qo‘lga kiritgan jamolar ham qimmatbaho sovg‘alar bilan taqdirlangan bo‘lsa, qolgan barcha ishtirokchi jamoalar kitoblar jamlanmasi bilan rag‘batlantirildi.