Stansiya va korxonalardagi yangiliklar, ishlab chiqarish hamda bunyodkorloklar o‘rganildi
Stansiya va korxonalardagi yangiliklar, ishlab chiqarish hamda bunyodkorloklar o‘rganildi
15 iyul kuni “O‘zbekiston temir yo‘llari” aksiyadorlik jamiyati boshqaruvi raisi Zufar Narzullayev boshchiligidagi rahbariyat va mutaxassislar Toshkent shahri va poytaxt viloyatidagi temir yo‘l korxonalariga tashrif buyurib, amalga oshirilayotgan ishlar, joriy etilayotgan yangiliklarni ko‘zdan kechirishdi.
Dastlab Z.Narzullayev va boshqaruv raisi o‘rinbosarlari, «Temiryo‘linfratuzilma» aksiyadorlik jamiyati rahbariyati hamda “Toshkent mintaqaviy temir yo‘l uzeli” filiali va boshqarma boshliqlari O‘zbekiston hamda Qozog‘iston Respublikasi davlat chegaralari hududida joylashgan “Oq-ko‘prik” temir yo‘l o‘tkazish punktida olib borilgan yangi qurilish ishlari hamda stansiyadagi Markazlashtirilgan mikroprosessor(MPS) – Turon tizimini joriy qilish bo‘yicha taqdimot bilan tanishishdi.
Maʼlumki, Qozog‘iston va O‘zbekiston chegara hududida joylashgan “Oq-ko‘prik” temir yo‘l stansiyasida yuk poyezdlari qatnovining keskin ortib borishi natijasida “O‘zbekiston temir yo‘llari” aksiyadorlik jamiyati rahbariyati topshirig‘iga ko‘ra, bu yerda bir qancha qurilish ishlari amalga oshirildi, raqamlashtirish jarayonlari to‘g‘ri bajarildi, yangi texnologiyalar o‘rnatildi. Bu dastlab 2023 yil dekabr oyida stansiyadagi yo‘l o‘tkazish yo‘laklarini 2 tadan 6 tagacha ko‘paytirish bilan boshlandi. Natijada avvallari chegara hududida yuk vagonlarini 2-3 soat ko‘rigi amalga oshirilgan bo‘lsa, yangi sharoitlar tufayli bu holat bor yo‘g‘i 45 daqiqa vaqtni olyapti xolos.
Shuningdek, avvallari stansiyadagi strelkali o‘tkazgichlar qo‘l mehnati bilan amalga oshirilgan bo‘lsa, hozirda zamonaviy va raqamli texnikalarda bu jarayon avtomatik, markazlashgan tarzda bajariladi. Bundan tashqari, poyezdlarni qabul qilish va jo‘natish ishlarini tezlashtirish uchun bojxona va chegara xodimlari uchun maxsus yo‘lakchalar joriy etilib, umumiy soni 6 ming 200 tadan ortiq beton plitalar yotqizildi. Stansiya yo‘laklariga qo‘shimcha yoritgichlar ham o‘rnatilib, yomg‘irli va qorli kunlarda chegara va bojxona xodimlarining dam olishi hamda maxsus jihozlarini quvvatlashi uchun maxsus kabinkalar qo‘yib berildi. Stansiya bo‘ylab esa yangi rels va beton shpallari o‘rnatildi.
Avvallari ushbu chegara hududi orqali bir kunda 20-21 yuk poyezdi qabul qilinib, yana shuncha yuk poyezd jo‘natilgan bo‘lsa, yangi yo‘l o‘tkazgichlar qurilgach, bu ko‘rsatkich 35-38 poyezd qabul qilib, yana shuncha poyezd jo‘natilishiga erishildi.
Yaqinda esa stansiyada yangi elektrlashtirish va markazlashtirish binosi qurilib, ishchi-xodimlar uchun barcha sharoitlarga ega qulayliklar yaratildi va zamonaviy jihozlar bilan taʼminlandi. Yangi kompyuterlar, aloqa tizimlari, sovitkich va mebel jihozlari, dam olish va yuvinish xonalari tashkil etildi. Amalga oshirilgan bu ishlardan maqsad stansiyada mehnat qilayotgan temiryo‘lchilarga qulaylik yaratib, ish unumdorligini ortishini taʼminlashdan iboratdir.
Boshqaruv raisi stansiyada yaratilgan sharoitlar bilan tanishib, masʼul mutaxassislarga qo‘shimcha topshiriqlar berdi. Shundan so‘ng keyingi manzil Yuqori tezlikdagi texnik xizmat ko‘rsatish deposi bo‘ldi. Z.Narzullayev bu yerda temiryo‘lchi mutaxassislar tomonidan tayyorlangan “Afrosiyob” elektropoyezdi kabinkasi ko‘rinishidagi amaliy stenel simulyator faoliyati bilan tanishdi. Malaka oshirish va amaliy o‘quv qo‘llanmasini o‘rganish uchun kelgan mashinistlar, temiryo‘lchi mutaxassislar uchun juda qulay va foydali bo‘lgan hamda zamonaviy kompyuter texnologiyalari bilan jihozlangan maxsus o‘quv amaliyot o‘tash uchun tayyorlangan moslama boshqaruv raisida katta taassurot qoldirdi. Yosh mutaxassislarni malaka oshirishida, bilim va ko‘nikma olishida yaxshi samara berishini aytib o‘tdi. Shundan so‘ng ushbu sexda yuqori tezlikda harakatlanuvchi elektropoyezdlarga xizmat ko‘rsatish markazi qurilishi ko‘zdan kechirildi. Z.Narzullayev ushbu loyihani sifatli va o‘z muddatida bajarish uchun tegishli mutaxassislarga zarur ko‘rsatmalar berdi.
Navbatdagi manzil “Toshkent-mexanika zavodi” aksiyadorlik jamiyati bo‘lib, bu yerda O‘zbekiston temir yo‘l tizimi tasarrufidagi lokomotivlar, texnikalar va korxonalar uchun zarur bo‘lgan mahsulotlarning Mahalliylashtirish dasturi asosida ishlab chiqarilganlari tashrif buyuruvchilarga taqdim etildi.
Z.Narzullayev import o‘rnini bosadigan ushbu milliy jihozlarning sifatiga yaxshi baho berib, temir yo‘l uchun kerakli bo‘lgan yana boshqa mahsulotlarni ham mahalliylashtirishni ko‘paytirish zarurligini va import mahsulotlarini kamaytirib, xorij valyutasini tejab qolish lozimligini tushuntirib o‘tdi.
“Eyvalek maxsus temir-beton” masʼuliyati cheklangan jamiyati “O‘zbekiston temir yo‘llari” aksiyadorlik jamiyatining yo‘l o‘tkazgich va ko‘priklar uchun balkalar, sunʼiy inshootlar uchun esa temir-beton mahsulotlari hamda temir yo‘llarga rels shpallari ishlab chiqaradigan va yetkazib beradigan asosiy korxonalardan biridir. Jamiyat rahbariyati ushbu korxonaga tashrifi davomida bu yerdagi ishlab chiqarish sexlari faoliyati bilan yaqindan tanishdi. Boshqaruv raisi masʼul mutaxassislarga ishlab chiqarilayotgan mahsulotlar sifatini yana-da yaxshilab, talab va taklifga qarab ko‘rsatkichlarni oshirish vazifasini qo‘ydi.
"O'zbekiston temir yo'llari" AJ
Axborot-tahliliy media markazi
“O‘zbekiston temir yo‘llari” AJ rasmiy saytining materiallaridan foydalanish, shu jumladan republikasiya qilish, faqat belgilangan shartlarni bajargan holatdagina foydalanish mumkin.
BELGILANGAN SHARTLARNI BAJARILMASLIK O‘ZBEKISTON RESPUBLIKASI QONUNCHILIGINING BUZILISHI HISOBLANADI
