O‘zbekiston
temir yo‘llari

Aksiyadorlik jamiyati

Yangi O‘zbekistonning yangi temir yo'l loyihalari katta samara beradi

Davlatimiz rahbari tomonidan 2017-yil 2-avgustda “O‘zbekiston Respublikasi temir yo‘l transporti xodimlari kunini nishonlash to‘g‘risida”gi farmoni imzolangach, har yili avgust oyining birinchi yakshanba kunini soha xodimlari “O‘zbekiston Respublikasi temir yo‘l transporti xodimlari kuni” sifatida katta tantana bilan nishonlashmoqda.

Ushbu bayramni temiryo‘lchilar har yili katta intiqlik bilan kutishadi. Chunki kasb bayramida sohamizda erishilgan yutuqlar, muvaffaqiyatlar e’tirof etiladi, ayniqsa, davlatimiz rahbarining har yili temir yo‘l hodimlariga yo‘llaydigan tabrigi bu sohada mehnat qilayotgan barcha ishchi-xodimlar qalbini faxr va g‘ururga to‘ldirib, kasbidan baxt topayotganini yana bir bor anglatadi. Shuningdek, “O‘zbekiston temir yo‘llari” aksiyadorlik jamiyati boshqaruvi raisi Zufar Narzullayevning 2025-yil 21-iyundagi “Temir yo‘l transporti xodimlari kunini nishonlashga tayyorgarlik ko‘rish va uni o‘tkazish to‘g‘risida”gi buyrug‘iga asosan tizimda mehnat qilayotgan barcha xodimlar, ya’ni 65 mingdan ortiq temiryo‘lchilar bir martalik besh yuz ming so‘m pul mukofoti bilan, shuningdek, o‘z yo‘nalishida yaxshi natija ko‘rsatayotgan, halol, fidoyi va mehnatkash, ilg‘or hamda ibratli soha xodimlarining juda ko‘p qismi faxriy yorliq, esdalik sovg‘alari hamda moddiy va ma’naviy rag‘batlantirilmoqda. Yana bir guruh kasb egalari esa temir yo‘l tizimidagi eng nufuzli mukofot – “Faxriy temiryo‘lchi” belgisi bilan tantanali taqdirlanadi.

Albatta, mamlakatimiz prezidenti Shavkat Mirziyoyev va O‘zbekiston temir yo‘llari rahbariyatining temiryo‘lchilarni kasb bayramida e’tirof etishi, turli nufuzli mukofotlar bilan rag‘batlantirishi, moddiy va ma’naviy qo‘llab-quvvatlashi negizida, avvalo, Vatanga, kasbga sadoqat, fidoyilik, mashaqqatli mehnat bor, desak yanglishmaymiz.

Chunki Prezidentimizning 2023-yil 10-oktyabrdagi “O‘zbekiston Respublikasi temir yo‘l transporti sohasini tubdan isloh qilish chora-tadbirlari to‘g‘risida”gi qaroriga asosan so‘nggi 2 yil davomida tizimda katta o‘zgarishlar bo‘ldi. Bu yillarda temir yo‘l transportini reforma qilish natijasida mazkur sohada yuksak marralarga erishilmoqda. Bugungi kunga kelib temir yo‘l transporti tizimi o‘z taraqqiyotining yangi bosqichiga ko‘tarildi.
Temir yo‘l transporti sohasini tubdan isloh qilish, murakkab tog‘ va cho‘l sharoitlarida yangi temir yo‘llarni barpo etish, yuqori tezlikdagi poyezdlar harakatini tashkil qilish, temir yo‘llarni elektrlashtirish, yuk va yo‘lovchi tashish vagonlarini ishlab chiqarish bo‘yicha yirik loyihalarning amalga oshirilishi nafaqat transport infratuzilmasini rivojlantirish, balki butun mamlakatni taraqqiy ettirishga xizmat qilmoqda.

Joriy yilgi kasb bayramini mehnatkash temiryo‘lchilar sohadagi katta loyihalar bunyodkorligi arafasida kutib olishmoqda. Xususan, 196,12 kilometrlik “Miskin – Nukus” temir yo‘li yuqori tezlikda harakatlanuvchi poyezdlar uchun moslashtirilib, elektrlashtirilmoqda. “Navoiy – Buxoro” yo‘nalishida yuqori tezlikka moslashtirilgan 92,1 kilometrlik ikkinchi elektrlashtirilgan temir yo‘l liniyasi bunyod etilmoqda. “Samarqand – Urgut” yo‘nalishida 55 kilometrlik hamda “Baytqo‘rg‘on – Parkent” oralig‘ida 23,8 kilometrlik yangi elektrlashtirilgan temir yo‘l liniyalari qurilmoqda. Ushbu loyihalarning amalga oshirilishi va hayotga tatbiq etilayotgani, eng avvalo, turizm salohiyati va jozibadorligini oshiradi, shuningdek, yuk va yo‘lovchi tashish tezligi bir necha barobarga ortib, yo‘lovchilarga xizmat sifati yanada yaxshilanadi. Eng muhimi, ekologiya va atrof-muhit musaffoligi saqlanishiga erishiladi.

Mamlakatimiz iqtisodi va xalqimiz farovonligi uchun nihoyatda muhim bo‘lgan ushbu loyihalar ijrosini muvaffaqiyatli amalga oshirishda siz, aziz temiryo‘lchilarga ishonamiz.

Bugungi kasb bayrami har biringizga muborak bo‘lsin, aziz temiryo‘lchilar, yurtimiz ravnaqi yo‘lida sohamizda bundan-da katta loyihalarni samarali bajarish nasib etsin.

Читайте также